讲讲“糊涂”(沪语写作) 

您好,欢迎访问上海农场知青网 用户注册 用户登录

彩虹天地

当前位置:上海农场知青网 -> 彩虹天地 -> 正文

讲讲“糊涂”(沪语写作)

日期:2021-12-03 05:38:25 点击数:464 来源:彩虹天地编辑部 作者:冯济民

     

讲讲“糊涂”(沪语写作)




特邀通讯员:冯济民





      "糊涂",迭是阿拉经常讲个一个词。糊涂有辰光是好事体,有辰光却相反。糊涂搭精明是相对个。


       样样事体有个可以糊涂,有个勿可以糊涂。有个事体糊涂,会让侬活得潇洒轻松。有个事体勿糊涂,让侬活得邪气吃力。有个事体糊涂会让侬因祸得福,有个事体糊涂会让侬悔恨终身。一般讲,大事体勿可以糊涂,小事体可以糊涂;生活浪可以糊涂,工作浪特别是政治浪勿可以糊涂。鸡毛蒜皮可以糊涂,大是大非勿可以糊涂。


       举个例子。前枪把社会浪出了一桩轰动一时个新闻,就是周公子生日宴请。当几个著名主持人去捧场,还讲了蛮多勿应该讲个肉麻闲话,结果引起公愤,引发众怒,从而拨电视出镜资,伊拉个主持人生涯也基本因此而终结,令人惋惜。交关人侪讲,迭眼主持人忒糊涂了,迭种宴请哪能好去参加。即使去了,哪能好瞎讲八讲。也有眼主持人尽管也到邀请,但伊拉呒没去,后来一眼事体也呒没,迭就聪明了。迭种事体决勿好糊涂个。记得毛主席评价叶剑英有句有名个闲话叫:吕端大事勿糊涂。就是表扬伊勒大是大非问题勿糊涂,迭句闲一直拨大家传讲。


       有句闲话叫"聪明一世,糊涂一时"。迭是讲有眼人一直蛮聪明个,却勒某桩事体、某个问题浪却糊涂了,结果一失足成千古恨。迭能个例子勒平常生活当中听到个看到个实在忒多了,教训深刻。


       郑板桥有句名言叫"难得糊涂",交关人拿迭幅字挂勒墙壁浪勉励自家。迭句闲话是蛮有道理个。人有辰光是要糊涂一眼,马虎一眼,勿好忒顶真,勿好样样啥侪斤斤计较。但是糊涂只能是难得个,勿好一直糊涂,也勿好样样啥侪糊涂,迭是要吃亏坏事体


       人个一生会得碰到各种各样事体。啥个事体可以糊涂一眼,啥个事体勿可以糊涂,自家一定要把握牢。比方读啥个大学、啥个专业勿好糊涂,做啥个工作勿好糊涂,加入啥组织勿糊涂,恋爱结婚寻啥勿好糊涂。迭眼事体假使糊里涂,会得影响侬个一生。


       糊涂也有真糊涂搭假糊涂。假糊涂其实并勿糊涂,阿拉平常讲就叫"装戆"。有交关事体侬心里煞煞清,但又勿好明讲,就只好"揣着明白装糊涂"。迭也是迫于无奈,呒没办法。迭个"装"也要装得像,勿好露马脚,实在也蛮难个。


       记得上世纪80年代有部著名电视剧叫《过把瘾》。剧中有首歌叫《糊涂的爱》。歌中唱道:这就是爱,说也说不清楚。这就是爱,糊里又糊涂。这就是爱,它忘却了人间的烦躁。这就是爱,它保着糊涂的温。"迭大概就是对爱最好个诠释。糊涂是讲勿清爽个,但糊涂也是有温度个。歌词听上去好像讲清了,再想想却好像又呒没,还是有糊涂。


       人活勒世界浪,有辰还是糊涂一眼好。勿必啥个事体、啥个问题侪搞得清清爽爽,明明白。讲穿了,勒啥地方有啥个糊涂。坚持原则即勿糊涂,放弃原则即所谓糊涂。勒重大事体浪须头脑清醒,勒鸡毛蒜皮方面就睁只眼闭只眼。迭大概就是“糊涂”个界限伐,也是“糊涂”个灵活性。


       唉!我想讲讲"糊涂",但想勿到其实"糊涂"也蛮复杂个,并勿简单!勿过随便哪能,阿拉勿好糊里糊涂过一世个,侬讲对伐?

分享到:

文章评论

全部评论 (0)

活动图片

more